OKB: Të zbardhen krimet e komunizmit dhe krimet pa gjyq

Denion Ndrenika

Një reporter i Kombeve të Bashkuara kërkoi nga qeveria e kryeministrit Sali Berisha që të bëjë zbardhjen e të gjitha krimeve që nuk kanë kaluar nëpër shkallët e gjyqësorit, përfshi autorët dhe ndodhitë gjatë kohës së regjimit të paraviteve ‘90-të. Reporteri Filip Alston që ndodhet prej datës 15 në Shqipëri, tha në takim me kryeministrin se Shqipëria duhet të zbardhë të gjithë krimet e kryera gjatë periudhës së diktaturës komuniste dhe të bëjë transparencën e plotë për ngjarjet dhe aktorët. “Shqipëria duhet të zbardhë të gjithë krimet e kryera gjatë periudhës së diktaturës komuniste dhe të bëjë transparencën e plotë për ngjarjet dhe aktorët”-u citua Alston.

Ai po ashtu ka vlerësuar, sikurse raportoi faqja zyrtare e kryeministrisë, faktin që Shqipëria ka kuadrin e plotë ligjor për krimet ndaj jetës së njeriut, si edhe vendosmërinë dhe rezultatet e qeverisë në luftën kundër krimeve ndaj jetëve njerëzore, përfshi edhe rastet krimeve për arsye të hakmarrjes, por edhe ndaj krimeve të tjera siç janë dhuna në familje. Sipas Alstonit, Shqipëria është ndër vendet me më pak probleme për sa i përket numrit të vrasjeve jashtëgjyqësore. Ndërkaq, Berisha i tha Alstonit se po bëhet nga qeveria çdo përpjekje për krijimin  e institutit për krimet e komunizmit dhe ngritjen e task forcës që do të kërkojë, gjejë dhe identifikojë eshtrat e viktimave të komunizmit. Ai tha gjithashtu se lufta me zero tolerancë kundër krimit është dhe mbetet përparësi themelore e punës së qeverisë.

Alston u emërua Raporter i Posaçëm në 2004 nga Komisioni i OKB-së për të Drejtat e Njeriut, si i pavarur nga qeveritë dhe vepron në zotësinë e tij individuale. Në “autoritetin” e raportuesit Alston përfshihet zbardhja e krimeve pa gjyq, që nuk përjashton rastin e biznsemenit shqiptar nga Ish-Republika Jugosllave e Maqedonisë, Remzi Hoxha që nuk gjendet që prej vitit 1995 dhe që në procesin gjyqsor kosniderohet prej prokurorisë si i rrëmbyer nga punonjës të asokohshëm të Shërbimit Informtiv Kombëtar, sot Shërbimi Informativ i Shtetit. Ai ka takuar aktorë shoqërorë në Tiranë dhe në Shkodër që kanë dëshmuar mbi fenomenin e gjakmarrjes dhe që janë brenda funskionit të tij për çështjet e mosndëshkimit dhe përgjegjësisë penale për vrasjet. Përqendrimi i reporterit Alston ishte për vëzhgimin dhe dëshmimin e rasteve të dyshuara të vrasjeve dhe shkaqet e tyre, si dhe nëse janë marrë masa ligjore efikase për të hetuar, ndjekur penalisht dhe dënuar personat përgjegjës. Alston u takua edhe me familjarë të viktimave dhe dëshmitarë të vrasjeve.

NËSE JO PATRIOT, ÇFARË ISHTE ENVER HOXHA?

ANDREA STEFANI

Reagimet e shumta për artikullin “Enver Hoxha patriot?! Një lajthitje e Rexhep Qoses”, detyrojnë shprehjen më eksplicite të opinionit se çfarë qe Enveri. Nëse jo patriot, atëherë çfarë? Çështja është e një rëndësie jo thjesht skolastike, por me theks mjaft praktik, ngaqë ka të bëjë me të mësuarit nga historia për të mos përsëritur, në të sotmen dhe të nesërmen, gabimet e së shkuarës. Ndërkaq, nuk mund të flasësh a shkruash për figura të tilla, pa ngacmuar një furi pasionesh antagoniste, urrejtje dhe dashuri, simpati dhe antipati, pështirosje dhe idhujtari që duke u përplasur, pengojnë arsyetimin rreth një politikani si Enver Hoxha i cili dominoi jetën e Shqipërisë për thuajse gjysmë shekulli. Dhe aq ngushtë është lidhur Shqipëria e atyre viteve me kultin e Enver Hoxhës, sa lavdërimi i tij nuk mund të mos jetë edhe lavdërim i diktaturës. Dhe lavdërimi i diktaturës nuk është thjesht shprehje e një nostalgjie të padëmshme, por simptomë e ngjizjes së aspiratës për diktaturë.